Paratoi ar gyfer Brecwast Bedydd

Rai wythnosau yn ôl, cawsom ein Brecwast Bedydd cyntaf… ac roedd yn un gwerth chweil yn wir!

Fe wnaethom ni hysbysebu yn yr eglwys ac yn y cyffiniau a dim ond tri theulu ddaeth – dyw hyn ddim yn swnio fel rhyw lawer, ond fe anogon ni’r mamau a siaradodd â ni (mamau ydyn nhw, bron bob amser) i ddod i’r brecwast gyda’u partneriaid, rhieni bedydd, neiniau a theidiau, ffrindiau sy’n pendroni am fedydd, a dyna ddigwyddodd.

Tua 9.30am ar fore Sadwrn, roedd deunaw o oedolion, un babi, dau blentyn bach, pedwar gwirfoddolwr a fi’n bresennol. Fe wnaethon ni weini croissants, teisennau crwst, tost a jam ac yna awgrymu eu bod nhw’n edrych ar y cardiau cwestiynau oedd ar bob bwrdd, a chael sgwrs.

Roedd y gwirfoddolwyr yn cadw llygad ar ei gilydd ac yn gyfrifol am eistedd a sgwrsio gyda phobl a gwneud y tost am yn ail! Roedd y plant yn bwyta’n gyflym ac wrth eu boddau gyda’r lle chwarae syml iawn – ‘sgwâr o gadeiriau’ – 20 o gadeiriau hamddenol, isel mewn sgwâr gyda byrddau isel yn y canol a theganau ac ati ar gyfer y ddau blentyn bach a ddaeth.

Tua 10.15am fe wnaethon ni awgrymu bod yr oedolion yn ymuno â’r plant a threulio 15 munud yn siarad fel grŵp, gan ateb cwestiwn neu ddau a sôn wrthyn nhw am y gwasanaeth ond yn gyffredinol, fe fuon ni’n meithrin cysylltiadau. Roeddem wrth ein bodd pan ddaeth un fenyw ifanc a oedd yn hynod bryderus am ei mab ‘bywiog’ i deimlo’n ddigon hyderus i ddod ag ef i’r eglwys ar Sul y Pasg. Cyn hynny, roedd hi wedi ofni dod ag ef rhag ofn y byddai’n cadw reiat.

Felly, o fewn awr, cryfhawyd y berthynas gyda theulu o’r eglwys a theulu arall, a lliniarwyd ofnau teulu newydd sbon am yr eglwys. Fe adawon nhw’n gwybod beth i’w ddisgwyl - ymweliad gan glerig a fyddai’n mynd trwy’r gwasanaeth ac wynebau cyfarwydd i’w croesawu ar y diwrnod.

Fe roddon ni beth llenyddiaeth iddyn nhw – roedden ni i gyd yn hoffi’r cardiau rhieni bedydd gyda magned oergell y tu mewn – ac roedd pawb yn gadael gyda gwên.

Ficer o Lerpwl