Dechrau eich hyfforddiant ar gyfer y Weinidogaeth Drwyddedig

Dechrau Hyfforddi ar gyfer y Weinidogaeth

Llongyfarchiadau! Rydym yn edrych ymlaen at weithio gyda chi ar eich taith tuag at weinidogaeth ordeiniedig neu drwyddedig. Rydym yn galw hyfforddiant ar y weinidogaeth yn ‘ffurfiant’. Mae hyn oherwydd credwn mai’r peth pwysicaf yn ystod y cyfnod hwn yw eich bod yn tyfu hyd yn oed yn fwy i fod yr unigolyn y mae Duw yn galw arnoch i fod. Nid yw’n ymwneud â dysgu ffeithiau neu sgiliau yn unig, ond â thyfu mewn aeddfedrwydd yng Nghrist. Os yw bod yn weinidog yn golygu helpu eraill i wneud hyn (gweler Effesiaid 4: 11-13), yna mae ffurfiant ar gyfer y weinidogaeth yn ymwneud â’n cynorthwyo i fodelu hyn ynom ni ein hunain.

Mae’r hyfforddiant yn cymryd dwy neu dair blynedd fel arfer, yn llawn amser neu’n rhan amser. Mae ymgeiswyr rhan amser wedi’u lleoli yn eu cartrefi a byddant yn mynd ar leoliad ac yn dysgu am ddiwinyddiaeth yn lleol. Bydd ymgeiswyr llawn amser yn dod i Athrofa Padarn Sant, Caerdydd am 48 awr, o ddydd Mercher i ddydd Gwener, am 30 wythnos y flwyddyn ac maent yn mynd ar leoliad am 2 ddiwrnod naill ai yn ardal Caerdydd neu yn ardal eu cartref, a allai fod yn unrhyw le yng Nghymru. Mae’r holl ymgeiswyr yn dilyn patrwm cyffredinol ar gyfer cyrsiau preswyl lle’r ydym yn dysgu am ddiwinyddiaeth ac ymarfer gweinidogaeth ynghyd. Mae’r dyddiadau ar gael gryn amser o flaen llaw a byddwch yn eu canfod yma. Mae’n hanfodol eich bod yn mynychu’r holl hyfforddiant felly nodwch y dyddiadau yn eich dyddiadur nawr.

Rydym hefyd yn credu bod yr hyfforddiant gorau yn ‘integredig’. Yr hyn a olygwn wrth hyn yw bod pob dim a ddysgwn, pa un a yw’n ddiwinyddiaeth academaidd, yn sgiliau gweinidogol neu’n dwf ysbrydol ac emosiynol, yn bwydo i mewn i’w gilydd ac yn hysbysu ei gilydd. Dyna pam mae pawb sy’n hyfforddi ar gyfer y weinidogaeth â ni yn gwneud pob rhan o’r hyfforddiant, hyd yn oed os oes gennych lawer o brofiad mewn unrhyw faes unigol. Rydym bob tro eisiau adeiladu ar yr hyn yr ydych yn ei wybod eisoes a’ch cynorthwyo i symud ymlaen i’r cam nesaf. Mae mwy y gallwn ei ddysgu o hyd - mae ffurfiant ar gyfer y weinidogaeth yn daith gydol oes.

Pedair elfen sylfaenol ein hyfforddiant yw:

Diwinyddiaeth ac Ymarfer Gweinidogaeth a ddysgir ar ein cyrsiau preswyl

Byddwch yn mynychu 4 o gyrsiau preswyl y flwyddyn, a gynhelir mewn lleoliadau ledled Cymru - ysgol haf am wythnos gyfan (fel arfer y drydedd wythnos ym mis Awst) a thri phenwythnos. Byddwn yn edrych ar flaenoriaethau gwahanol esgobion ar gyfer gweinidogaeth ym mhob cwrs preswyl a byddwn yn cwrdd mewn grwpiau blwyddyn gwahanol i edrych ar ddiwinyddiaeth ac ymarfer pregethu ac arwain addoliad, gweithio gyda phobl o bob oed, gofal bugeiliol, arloesi a thyfu cymunedau Cristnogol newydd. Pob blwyddyn yn ystod yr ysgol haf, byddwn naill ai’n edrych ar Ysbrydolrwydd a gweddïo neu Arwain eich Eglwys i Dyfu neu Arweinyddiaeth gan ddilyn rhaglen dreigl.

Astudiaeth Ddiwinyddol

Mae Dysgu am Dduw yn agwedd bwysig ar ffurfiant ac mae pawb sy’n hyfforddi gyda ni yn dilyn rhyw fath o gwrs diwinyddiaeth. Mae’r rhan fwyaf o’r ymgeiswyr ar gyfer y weinidogaeth yn astudio ar ein rhaglen BTh (gradd), a ddilysir gan Brifysgol Cymru Y Drindod Dewi Sant, ac a ddyluniwyd yn benodol gan ystyried anghenion disgyblaeth a’r weinidogaeth.

Os oes gennych radd mewn diwinyddiaeth eisoes, byddwch yn gallu dilyn cwrs ôl-raddedig - ein cwrs Meistr fel arfer, sydd wedi’i ddilysu gan Brifysgol Durham. Os oes gennych radd Meistr mewn diwinyddiaeth eisoes, byddwch fel arfer yn gwneud rhyw fath o radd ymchwil. Rydym yn eich annog i gyrraedd eich potensial o ran cymwysterau diwinyddiaeth - mae angen addysgwyr diwinyddiaeth ar yr Eglwys yng Nghymru ar gyfer y dyfodol.

Cysylltwch â ni cyn gynted â phosibl os oes angen i chi drafod eich astudiaeth ddiwinyddol.

Celloedd Ffurfiannol

Byddwch hefyd yn perthyn i gell lle y byddwch yn cwrdd ag ymgeiswyr eraill, dan arweiniad arweinydd profiadol, i adlewyrchu ar eich ffurfiant. Mae’n grŵp pwysig sy’n dwyn ynghyd yr holl agweddau ar yr hyfforddiant, i rannu problemau, gofyn am gyngor a mewnwelediad, a dysgu rhagor o sgiliau drwy wrando ar eraill a’u cefnogi. Mae gweithio’n dda mewn grwpiau’n sgil pwysig yn y weinidogaeth ac, yn ogystal â chael cefnogaeth, byddwch yn dysgu sgiliau gwrando pwysig

Lleoliadau

Byddwch yn dod yn rhan o dîm gweinidogaeth yn eich lleoliad, yn ennill profiad ymarferol ac yn cael eich cefnogi gan weinidog profiadol. Mae gennym diwtor penodedig sy’n trefnu ac yn cefnogi lleoliadau. Bydd ymgeiswyr llawn amser mewn lleoliad am 2 ddiwrnod yr wythnos, a bydd ymgeiswyr rhan amser mewn lleoliad am o leiaf 4 awr yr wythnos.

Rhaglen llawn amser

Fel arfer, os ydych yn hyfforddi ar gyfer gweinidogaeth llawn amser, byddwch yn hyfforddi ar y rhaglen llawn amser. Ar hyn o bryd, mae hyn yn 30 wythnos y flwyddyn, gyda 48 awr yn Athrofa Padarn Sant, Caerdydd lle y byddwch yn gwneud peth o’r elfennau sylfaenol e.e. y gell ffurfiannol, astudiaeth ddiwinyddol yn ogystal â Chymraeg (os nad ydych yn siarad Cymraeg eisoes), addoli (mae’r holl addoli wedi’i drefnu a’i werthuso mewn grwpiau) a rhaglen o weithdai ac astudiaeth gan ymarferwyr profiadol. Pob tymor, rydym yn cynnal digwyddiad gweddïo arbennig gyda siaradwr gwadd. Mae’r siaradwyr blaenorol yn cynnwys Rowan Williams, Malcolm Guite a Joanna Collicutt. Yr wythnos arferol yn ystod yr wythnosau hynny yw:

Gallwch weld enghraifft o amserlen arferol ar gyfer 48 awr yma.

Oes yn rhaid i mi dalu am y cwrs hwn?

Nac oes. Mae’r Eglwys yng Nghymru hefyd yn darparu grantiau i’r rheini sy’n hyfforddi ar gyfer y weinidogaeth. Ar gyfer ymgeiswyr rhan amser, mae hyn yn £435 y flwyddyn ar hyn o bryd a darperir treuliau am deithio. Ar gyfer ymgeiswyr llawn amser, gweler yr ateb isod.

Nac oes. Mae'r Eglwys yng Nghymru hefyd yn rhoi grantiau i bobl sy'n hyfforddi ar gyfer y weinidogaeth. O ran ymgeiswyr rhan-amser mae hyn yn £435 y flwyddyn ar hyn o bryd a darperir treuliau ar gyfer teithio. O ran ymgeiswyr amser llawn, gweler yr ateb isod.

Hoffwn hyfforddi'n amser llawn ar gyfer y Weinidogaeth ond rwy’n poeni na fyddaf yn gallu fforddio hynny.

Gweler y cwestiwn uchod. Does dim ffi, ac mae grantiau ar gael, i ymgeiswyr amser llawn, i dalu am gostau byw sylfaenol. Cyfrifir y grant hwn yn unigol gan ddibynnu ar gostau tai, incwm y cartref a chostau byw eraill. Pan fydd Athrofa Padarn Sant wedi cael ffurflen noddi'r ymgeisydd gan eu hesgobaeth, mae'r wybodaeth yn cael ei throsglwyddo i Adran Gyllid yr Eglwys yng Nghymru. Byddan nhw'n anfon rhagor o wybodaeth am yr hawl i gael grant a ffurflenni i'w llenwi er mwyn gwneud cais am grantiau. Gellir ddod o hyd i wybodaeth am Grantiau yma:

Gwybodaeth Grantiau i Ymgeiswyr

Cyfrifiannell 2024-2025 yn y broses o gael ei ddiweddaru

*I’r ymgeiswyr newydd sy’n byw mewn cartref i glerigion yn barod, cysylltwch â’r Rheolwr Gwasanaethau i Ddysgwyr*

Gan fod amgylchiadau pawb yn wahanol, cysylltwch â Siân Trotman, Rheolwr Gwasanaethau i Ddysgwyr sy'n ymdrin â grantiau, ac yn hapus iawn i'ch helpu.

sian.trotman@stpadarns.ac.uk